ഷർട്ടിന് മുകളിലൂടെ മുറിവിന് സ്‌റ്റിച്ചോ? ബോളിവുഡ് ഡോക്ടർമാർ കില്ലാഡികൾ തന്നെ, ട്രോൾ ഏറ്റുവാങ്ങി ഹിറ്റ് ചിത്രം

ഹർഷവർദ്ധൻ റാണെ, സോനം ബജ്‌വ എന്നിവരെ കേന്ദ്ര കഥാപാത്രങ്ങളാക്കി മിലാപ് സവേരി ഒരുക്കിയ റൊമാന്റിക്ക് ഡ്രാമ ചിത്രമാണ് 'ഏക് ദീവാനേ കി ദീവാനിയത്ത്'. കഴിഞ്ഞ വാരം തിയേറ്ററുകളിൽ എത്തിയ സിനിമയ്ക്ക് വളരെ മോശം അഭിപ്രായങ്ങളാണ് ലഭിക്കുന്നത്. എന്നാൽ ഏവരെയും ഞെട്ടിച്ചുകൊണ്ട് ബോക്സ് ഓഫീസിൽ കളക്ഷൻ വാരിക്കൂട്ടുകയാണ് സിനിമ. എന്നാൽ ഇപ്പോൾ സിനിമയിൽ നിന്നുള്ള ഒരു ചിത്രമാണ് സോഷ്യൽ മീഡിയയിലൂടെ വൈറലാകുന്നത്.

നായകനായ ഹർഷവർദ്ധൻ റാണെയ്ക്ക് പരിക്ക് പറ്റുമ്പോൾ ഷർട്ടിന് മുകളിലൂടെ ഡ്രസ്സ് ചെയ്തിരിക്കുന്ന ചിത്രമാണ് ഇപ്പോൾ വൈറലാകുന്നത്. ബോളിവുഡിലെ ഡോക്ടർമാർ എല്ലാം വളരെ അഡ്വാൻസ്ഡ് ആണ് പലരും കമന്റിലൂടെ കുറിക്കുന്നത്. പലരും സോഷ്യൽ മീഡിയയിലൂടെ സിനിമയെ ട്രോളുന്നുണ്ട്. സിനിമയുടെ കഥയും തിരക്കഥയും മോശമാണെന്നും എങ്ങനെയാണ് ഇത്തരം സിനിമകൾ പുറത്തിറങ്ങുന്നതെന്നുമാണ് പലരും കുറിക്കുന്നത്. സിനിമയുടെ ഇന്റർവെൽ സീൻ ഞെട്ടിച്ചെന്നും കമന്റുകളുണ്ട്.

പുറത്തിറങ്ങി രണ്ട് വാരം പിന്നിടുമ്പോൾ 60 കോടിയാണ് സിനിമ ഇന്ത്യൻ ബോക്സ് ഓഫീസിൽ നിന്നും വാരിക്കൂട്ടിയത്. ആദ്യ ദിനം 9 കോടി വാരിക്കൂട്ടിയ സിനിമയ്ക്ക് തുടർന്നുള്ള ദിവസങ്ങളിലും വലിയ നേട്ടമുണ്ടാക്കാൻ കഴിഞ്ഞു. പുനെ, അഹമ്മദാബാദ് തുടങ്ങിയ സ്ഥലങ്ങളിൽ വലിയ തിരക്കാണ് സിനിമയ്ക്ക് അനുഭവപ്പെടുന്നത്.

ദേശി മൂവീസ് ഫാക്ടറിയുടെ ബാനറിൽ നിർമ്മിച്ച ഈ ചിത്രത്തിൽ ഷാദ് രൺധാവ, സച്ചിൻ ഖേദേക്കർ, അനന്ത് നാരായൺ മഹാദേവൻ എന്നിവരും സിനിമയിൽ പ്രധാന വേഷങ്ങളിൽ എത്തുന്നുണ്ട്. സത്യമേവ ജയതേ 2 , മർജാവാൻ എന്നീ സിനിമകൾക്ക് ശേഷം മിലാപ് സവേരി ഒരുക്കിയ സിനിമയാണിത്. സംവിധായകന്റെ മുൻ ചിത്രങ്ങൾ എല്ലാം തന്നെ വലിയ തോതിലുള്ള വിമർശനങ്ങൾ ആയിരുന്നു ഏറ്റുവാങ്ങിയിരുന്നത്. അതേസമയം, ഹർഷവർദ്ധൻ്റെ ചിത്രമായ സനം തേരി കസം നേരത്തെ റീ റിലീസ് ചെയ്തിരുന്നു. വലിയ സ്വീകാര്യതയാണ് സിനിമക്ക് രണ്ടാം വരവിൽ ലഭിച്ചത്.

Content Highlights: Harsdhavardhan rane movie gets trolled